ڕاهێنه‌ری‌ پێشووی‌ یانه‌ی‌ چێڵسی‌ (خۆزیه‌ مۆرینهۆ) ڕایگه‌یاند كه‌به‌هیچ شێوه‌یه‌ك له‌گه‌ڵ یانه‌ی‌ ئه‌نته‌ر میلاندا له‌هه‌وڵی‌ لێك نزیك بوونه‌وه‌دا نه‌بوه‌ و به‌نیازیش نیه‌ له‌ئێستادا ئه‌وكاره‌ بكات .
له‌پاش ئه‌و هه‌واڵه‌ی‌ كه‌ له‌به‌شێك له‌ڕۆژنامه‌ وه‌رزشیه‌كانی‌ ئیتالیاوه‌ بڵاوكرایه‌وه‌ و تیایدا باس له‌وه‌كرا كه‌ یانه‌ی‌ (ئه‌نته‌ر میلان) ی‌ ئیتالی‌ له‌هه‌وڵی‌ گرێبه‌ستدایه‌ له‌گه‌ڵ ڕاهێنه‌ری‌ به‌توانای‌ پورتوغالی‌ (خۆزیه‌ مۆرینهۆ) به‌مه‌به‌ستی‌ گوێزانه‌وه‌ی‌ ناوبراو له‌وه‌رزی‌ نوێی‌ یاریكردندا بۆ ڕاهێنه‌رایه‌تی‌ یانه‌كه‌یان .
لای‌ خۆیه‌وه‌ مۆرینهۆ ئه‌مڕۆ سه‌رجه‌م ئه‌و هه‌واڵانه‌ی‌ ڕه‌تكرده‌وه‌و ووتی‌ ته‌نها پڕوپاگه‌نده‌یه‌, له‌درێژه‌ی‌ ووته‌كانیدا مۆرینهۆ ووتی‌ "هه‌تا ئێستا من سه‌رۆكی‌ یانه‌ی‌ ئه‌نته‌ر میلان (ماسیۆ مۆراتی‌) ناناسم و نه‌شم دیوه‌ له‌نزیكه‌وه‌, وه‌ئه‌و هه‌واله‌یشی‌ كه‌ده‌ڵێت گوایه‌ من له‌ڕۆژی‌ پێنج شه‌ممه‌ سه‌ردانی‌ میلانۆ ده‌كه‌م دووره‌ له‌ڕاستیه‌وه‌ .
جێگای‌ ئاماژه‌یه‌ كه‌له‌سه‌ره‌تای‌ ئه‌م مانگه‌وه‌ له‌ووته‌یه‌كیدا مۆرینهۆ له‌ شاری‌ ڤاله‌نسیای‌ ئیسپانی‌ ڕایگه‌یاند كه‌ ده‌خوازێت له‌ ئیتالیا یان له‌ ئیسپانیا گرێبه‌ستێك مۆر بكات له‌گه‌ڵ یه‌كێك له‌یانه‌کاندا.

 گاتوزۆی ئیتاڵی و یاریزانی یانه‌ی میلان له‌هه‌مان ولات ئه‌خوازێت خولی كاڵچۆی ولاته‌كه‌ی له‌به‌رژه‌وه‌ندی ڕۆما كۆتایی بێت.
له‌لێدوانێكیدا بۆ ڕۆژنامه‌نوسان یاریزانی به‌توانای ئیتاڵی و یانه‌ی ئه‌یسی میلان له‌هه‌مان ولات "جینارۆ گاتوزۆ" پاش ده‌ربڕینی په‌رۆشی بۆ دابه‌زینی ئاستی یانه‌كه‌ی و دوركه‌وتنه‌وه‌ له‌ململانێی به‌ده‌ستهێنانی خولی كاڵچۆ، هیوای خواست یانه‌ی ڕۆما بتوانێت نازناوی خوله‌كه‌ به‌ده‌ستبێنێت و بۆ جارێكی دی تۆتی نازناوه‌كه‌ له‌ئامێزبگرێت. له‌گه‌ڵ ئه‌وه‌ی ئێستا یانه‌ی ئه‌نته‌رمیلان چانسی به‌ده‌ستهێنانی نازناوه‌كه‌ی زیاتره‌ له‌ڕۆماو تائێستاش به‌چوار خاڵ له‌پێش ئه‌و یانه‌وه‌ دێت، ئه‌مه‌ جگه‌له‌وه‌ی یانه‌ی ئه‌نته‌رمیلان له‌هه‌مو ڕویه‌كه‌وه‌ نزیكتره‌و له‌یانه‌ی میلان به‌ڵام گاتوزۆ ئاره‌زومه‌نده‌ ئه‌نته‌ر له‌پله‌كانی پێشه‌وه‌ نه‌مێنێت و ڕۆمای ركابه‌ری ئه‌و یانه‌یه‌ له‌پله‌ی یه‌كه‌می جێگیربێت، ناوبراو هۆی ئه‌مه‌ی گه‌ڕانده‌وه‌ بۆ ئه‌و ئاسته‌ به‌رزه‌ی كه‌یانه‌ی رۆِما پیشانیده دات.

بوفۆنی باشترین گۆڵچی جیهان پێی وایه‌ یانه‌ی ئه‌نته‌رمیلانی ئیتاڵی گه‌لێك له‌یانه‌ی ڕۆمای هاونیشتمانی به‌هێزتره‌و توانای به‌ده‌ستهێنانی خولی كاڵچۆی له‌و یانه‌یه‌ له‌پێشتره‌.
پاش ئه‌وه‌ی یانه‌كه‌ی به‌بردنه‌وه‌ی له‌یانه‌ی ئه‌نته‌رمیلانی پێشه‌نگی خولی كاڵچۆی ئیتاڵی گه‌وره‌ترین دیاری پێشكه‌شی ڕۆمای ركابه‌ری ئه‌و یانه‌یه‌ كرد، بوفۆنی گۆڵچی یانه‌ی یۆڤانتۆسی ئیتاڵی و باشترین گۆڵچی ساڵی 2007 ، سه‌رسامی خۆی به‌تواناو به‌هێزی یانه‌ی ئه‌نته‌رمیلان ده‌ربڕی و به‌یانه‌یه‌كی به‌هێزتری ده‌بینێت له‌چاو یانه‌ی ڕۆما، ناوبراو له‌لێدوانێكدا له‌باره‌ی به‌ده‌ستهێنانی خولی كاڵچۆ له‌م وه‌رزه‌دا وتی "پێم وایه‌ یانه‌ی ئه‌نته‌رمیلان به‌هێزتره‌و چانسی ئه‌و زیاتره‌ بۆ به‌ده‌ستهێنانی نازناوه‌كه‌، چونكه‌ ئه‌و یانه‌یه‌ باش ده‌زانێت مامه‌ڵه‌ بكات و تواناو ئاستێكی بێ وێنه‌ی هه‌یه‌و به‌راورد ناكرێت به‌یانه‌ی ڕۆما."

 ئه‌مشه‌و تۆتی و هاوڕێكانی له‌یانه‌ی ڕۆمای ئیتاڵی بێده‌نگ كران و سنورێك بۆ هه‌ڕه‌شه‌و بردنه‌وه‌كانیان دانرا.
پاش چه‌ندین بردنه‌وه‌ی یه‌ك له‌دوای یه‌ك له‌خول و پاڵه‌وانێتیه‌ ناوخۆیی و ده‌ره‌كیه‌كان، ئه‌مشه‌و تۆتی و هاوڕێكانی له‌یانه‌ی ڕۆمای ئیتاڵی شه‌ربه‌تی دۆڕانیان پێنۆشكراو ده‌مكوت كران، ئه‌ویش پاش ئه‌وه‌ی له‌یاری لوتكه‌یی هه‌فته‌ی بیست و نۆی خولی كاڵچۆی وڵاته‌كه‌یاندا له‌به‌رامبه‌ر یانه‌ی لازیۆی هاوشاری خۆی دوچاری شكست هات و به‌دوگۆڵ به‌رامبه‌ر سێ گۆڵ ڕوبه‌ڕوی دۆڕانێكی نه‌خوازراو بوه‌وه‌، هه‌رچه‌نده‌ یانه‌ی ڕۆما له‌خوله‌كی 31 توانی له‌ڕێی "تادێی" به‌رازیلیه‌وه‌ گۆڵی پێشكه‌وتن تۆماربكات، به‌لام هه‌رزوو له‌كۆتا خوله‌كی یاریه‌كه‌دا گۆڵی یه‌كسانی له‌ڕێی یاریزان "باندێف"ه‌وه‌ لێكرایه‌وه‌، گێمی یه‌كه‌م به‌م ئه‌نجامه‌ كۆتایی هات، له‌گێمی دووه‌مداو له‌خوله‌كی 57 یانه‌ی لازیۆی خاوه‌ن یاریگا به‌هۆی لێدانێكی سزاوه‌ كه‌یاریزان "تۆماسۆ ڕۆكی" ئه‌نجامیدا گۆڵی دوه‌می تۆماركرد، پاش پێنج خوله‌ك له‌م گۆڵه‌ "پیرۆتا"ی ئیتاڵی گۆڵی یه‌كسانی بۆ یانه‌ی ڕۆما تۆماركرده‌وه‌، له‌خوله‌كی كۆتایی یاریه‌كه‌دا یانه‌ی لازیۆ به‌تۆماركردنی گۆڵی بردنه‌وه‌ له‌ڕێی یاریزانی سویسری "بیهرامی" یانه‌ی ڕۆمای بێ هیواكردو بردنه‌وه‌ یه‌ك له‌دوایه‌كه‌كانی ئه‌و یانه‌یه‌ی وه‌ستاندو دیاریه‌كی به‌نرخی پێشكه‌شی یانه‌ی ئه‌نته‌رمیلانی ركابه‌ری ڕۆما كرد، له‌كاتێكدا ئه‌م یانه‌یه‌ له‌هه‌مان خول و هه‌فته‌دا نه‌یتوانی سه‌ركه‌وتن به‌رامبه‌ر یانه‌ی جه‌نه‌وا به‌ده‌ستبێنێت و به‌یه‌كسان بونی به‌گۆڵێك بۆ هه‌ردولا بوه‌ خاوه‌نی خاڵێك و به‌كۆی "68" خاڵ و به‌جیاوازی حه‌وت خاڵ له‌گه‌ڵ ڕۆما له‌پله‌ی یه‌كه‌می ریزبه‌ندی خوله‌كه‌ مایه‌وه‌.گۆڵه‌كانی ئه‌م دیداره‌ش یاریزانان "سوزاۆ" له‌خوله‌كی 11 بۆ ئه‌نته‌ر و "ماركۆ بۆرییلۆ" له‌خوله‌كی 85 بۆ جه‌نه‌وا، تۆماركران.
جگه‌ له‌م دیدارانه‌ش ئه‌مانه‌ی خواره‌وه‌ ئه‌م ئه‌نجامانه‌ كۆتاییان هات:
تۆرینۆ0*1ئۆده‌نێزی ، پارما2*1پالێرمۆ ، ناپۆلی2*0فیۆرنتینا ، میلان1*2سامبدۆریا ، لیڤۆرنۆ1*1ریجینا ، ئیمپۆلی0*0یۆڤانتۆس ، كاتانیا0*0سینا ، كالیاری1*0ئه‌تڵه‌نتا.

 ئه‌مشه‌و به‌چه‌ند یاریه‌ك ململانێكانی هه‌فته‌ی بیست و نۆی خولی كاڵچۆی یانه‌كانی ئیتاڵیا ده‌ستپێده‌كات و كێبركێكان بۆكۆكردنه‌وه‌ی خاڵ قوڵترده‌بێته‌وه‌.
بڕیاره‌ ئه‌مشه‌و له‌هه‌فته‌ی بیست و نۆی خولی كاڵچۆی ئیتاڵیادا چه‌ند یاریه‌كی به‌هێز ببینرێت و كێبركێی خاڵ كۆكردنه‌وه‌ له‌نێوان یانه‌كان چڕتربێته‌وه‌ به‌تایبه‌ت هه‌ردوو یانه‌ی ئه‌نته‌رمیلانی پێشه‌نگ و ڕۆمای دووه‌می ریزبه‌ندی، له‌و یاریانه‌ی كه‌به‌گرنگ داده‌نرێت، ڕوبه‌ڕوبونه‌وه‌ی نێوان هه‌ردوو یانه‌ی پایته‌ختی ئیتاڵیا "لازیۆ و رۆما" ده‌بێت ئه‌م یاریه‌ كه‌له‌یاریگای یانه‌ی یه‌كه‌م به‌ڕێوه‌ده‌چێت بۆ هه‌ردولا جێی گرنگی ده‌بێت به‌تایبه‌ت یانه‌ی ڕۆما، چونكه‌ ئه‌م یانه‌یه‌ ده‌یه‌وێت به‌رده‌وامی بداته‌ بردنه‌وه‌كانی و له‌دواكه‌وتنی یانه‌ی ئه‌نته‌رمیلانی ركابه‌ری به‌رده‌وامبێت كه‌ئێستا به‌كۆی 6 خاڵ له‌دوای ئه‌و یانه‌وه‌ دێت، یانه‌ی ئه‌نته‌رمیلانیش كه‌به‌كۆكردنه‌وه‌ی 67 خاڵ پله‌ی یه‌كه‌می ریزبه‌ندی گرتووه‌، له‌مشه‌ودا له‌ده‌ره‌وه‌ی یاریگای خۆی ڕوبه‌ڕوی یانه‌ی جه‌نه‌وا ده‌بێته‌وه‌، ئه‌میش به‌هه‌مان شێوه‌ بردنه‌وه‌ تاكه‌ ئامانجیه‌تی و نایه‌وێت هی ئه‌نجامێكی تر جگه‌ له‌سه‌ركه‌وتن به‌ده‌ستبێنێت، چونكه‌ جگه‌ له‌و ئه‌نجامه‌ ڕێ بۆ یانه‌ی رۆما خۆش ده‌كات پله‌ی یه‌كه‌می لێوه‌ربگرێت.
جگه‌ له‌مانه‌ش ئه‌م یاریانه‌ به‌پێی ئه‌م خشته‌یه‌ی خواره‌وه‌ ئه‌نجامده‌درێت:
تۆرینۆ * ئۆده‌نێزی ، پارما * پالێرمۆ ، ناپۆلی * فیۆرنتینا ، میلان * سامبدۆریا ، لیڤۆرنۆ * ریجینا ، ئیمپۆلی * یۆڤه‌نتۆس ، كاتانیا * سینا ، كالیاری * ئه‌تڵه‌نتا'

 پاش بردنه‌وه‌كه‌ی ئه‌مشه‌وی، یانه‌ی ئه‌نته‌رمیلانی ئیتاڵی هه‌ڕه‌شه‌ی ركابه‌ره‌كه‌ی پوچه‌ڵكرده‌وه‌و به‌توندی وه‌ڵامی هێرشه‌كانی دایه‌وه‌.
شه‌وی ڕابردوو یانه‌ی ڕۆما كه‌به‌گوركه‌كان ناسراون، له‌یاری لوتكه‌یی هه‌فته‌ی بیست و هه‌شتی خولی كاڵچۆی ئیتاڵیدا توانی به‌ئه‌نجامی دوو گۆڵ به‌رامبه‌ر گۆڵێك له‌یانه‌ی میلان بباته‌وه‌، ئه‌م بردنه‌وه‌یه‌ بوه‌هۆی نزیك بونه‌وه‌یان له‌یانه‌ ركابه‌رو دژیه‌كه‌یان به‌جیاوازی ته‌نها شه‌ش خاڵ، بۆیه‌ كه‌وتنه‌ هه‌ڕه‌شه‌ له‌یانه‌ی ئه‌نته‌رمیلان و داوای چۆڵكردنی سه‌نگه‌ریان لێده‌كرد، به‌لام یانه‌ی ئه‌نته‌رمیلان به‌بردنه‌وه‌كه‌ی ئه‌مشه‌ویان توانیان وه‌ڵامی ئه‌و هه‌ڕه‌شانه‌ بده‌نه‌وه‌و به‌رده‌وامبن له‌كۆكردنه‌وه‌ی خاڵ و به‌رنه‌دانی پێشه‌نگی، ئه‌ویش پاش بردنه‌وه‌یان له‌یانه‌ی پالێرمۆ به‌دوو گۆڵ به‌رامبه‌ر گۆڵێك، گۆڵه‌كانی یانه‌ی ئه‌نته‌ر یاریزانان "ڤێرا"ی فه‌ره‌نسی و "خیمینس"ی شیلیی له‌خوله‌كه‌كانی "5 و 35" تۆماریانكرد، تاكه‌ گۆڵه‌كه‌ی به‌رامبه‌ریش یاریزان "ماتیراتزی" ئیتاڵی به‌هه‌ڵه‌ له‌خوله‌كی 25 تۆماریكرد، به‌مه‌ش یانه‌ی ئه‌نته‌رمیلان پێ"ه‌ی خۆی له‌پله‌ی یه‌كه‌می ریزبه‌ندی خوله‌كه‌ قایمتركردو كۆی خاڵه‌كانی گه‌یانده‌ 67 خاڵ.
هه‌رله‌هه‌مان خول ئه‌م یاریانه‌ی خواره‌وه‌ش به‌م ئه‌نجامانه‌ كۆتایان هات:
ساممبدۆریا3*1كاتانیا ، ڕیجینا4*0سینا ، لیڤۆرنۆ1*1پارما ، فیۆرنتینا3*1جه‌نه‌وا ، كالیاری3*0تۆرینۆ ، یۆڤنتۆس1*0ناپۆلی.

 ڕۆژی‌ شه‌ممه‌ له‌ خولی‌ ئیتالیادا و له‌ هه‌فته‌ی‌ بیست و هه‌شتی‌ ئه‌و پاڵه‌وانیه‌تیه‌دا به‌هێزترین یاری‌ ئه‌نجام ده‌درێت .
له‌ نێو گۆڕه‌پانی‌ (ئه‌ولیمبی‌) ی‌ پایته‌ختی‌ ئیتالیا ی‌ تایبه‌ت به‌یانه‌ی‌ ڕۆما, یانه‌ی‌ ئه‌ی‌ سی‌ میلان ده‌بێته‌ میوان و ده‌یه‌وێت به‌د نمه‌كانه‌ یانه‌ی‌ ڕۆما بدات به‌زه‌ویداو تۆڵه‌ی‌ سه‌رجه‌م دۆڕاندنه‌كانی‌ خۆی‌ له‌و بكاته‌وه‌ .
ئه‌م یاریه‌ له‌خولی‌ (كالیتشۆ) دا به‌به‌ هێزترینی‌ یاریه‌كان ده‌ژمێردرێت, به‌تایبه‌ت دوای‌ ئه‌وه‌ی‌ له‌یاری‌ ڕۆیشتندا یانه‌ی‌ پایته‌خت له‌ نێو یاریگای‌ میلاندا به‌گۆڵێك خۆی‌ له‌ میوانداری‌ میلان بیزاركردوو لێی‌ برده‌وه‌ .
هه‌ربۆیه‌ ئه‌مجاره‌یان میلانیش ده‌یه‌وێ تۆڵه‌ی‌ قورسی‌ لێبكاته‌وه‌, له‌م یاریه‌دا ڕۆما گاڵته‌ی‌ به‌ قسه‌كانی‌ میلان دێت و ده‌ڵێت كه‌ یانه‌كه‌ی‌ به‌ توانایه‌كی‌ باشه‌وه‌ ده‌چێته‌ نێو یاریگا و هانده‌رانی‌ پایته‌خته‌وه‌ به‌تایبه‌ت دوای‌ سه‌ركه‌وتنی‌ بۆ قواناغی‌ هه‌شتی‌ یانه‌ پاڵه‌وانه‌كانی‌ ئه‌وروپا .
ئێستا هانده‌رانی‌ هه‌ردوو یانه‌ و تامه‌زرۆیانی‌ یاری‌ جوانی‌ نێو یاریگا له‌ چاوه‌ڕوانی‌ كێبه‌ركێی‌ نێوان هێرشبه‌ری‌ ڕۆما (فرانشیشكۆ تۆتی‌) و هێرشبه‌ری‌ میلان (كاكا) ی‌ خاوه‌نی‌ باشترین یاریزانی‌ جیهاندان كه‌بزانن كامیان توانای‌ سه‌ركه‌وتنیان هه‌یه‌ به‌سه‌ر ئه‌وی‌.

ڕاهێنه‌ری یانه‌ی ئه‌نته‌رمیلانی ئیتاڵی "ڕۆبێرتۆ مانشینی" پاش كۆتای هاتنی یاریه‌كانی وه‌رزی ئه‌مساڵ ماڵئاوایی له‌یانه‌كه‌ی ده‌كات.
پاش كۆتایی هاتنی یاری یانه‌كه‌ی به‌رامبه‌ر یانه‌ی لیڤه‌رپولی ئینگلیزی له‌میانی یاریه‌كی دواخراوی قۆناغی دووه‌می جامی یانه‌ پاڵه‌وانه‌كانی ئه‌وروپا، كه‌به‌ئه‌نجامی گۆڵێكی بێ به‌رامبه‌ر شكستی خواردو كرایه‌ ده‌ره‌وه‌ی پاڵه‌وانێتیه‌كه‌، ڕاهێنه‌ری یانه‌ی ئه‌نته‌رمیلانی ئیتاڵی "ڕۆبێرتۆ مانشینی" له‌لێدوانێكیدا بۆ ڕۆژنامه‌نوسان وازهێنانی خۆی له‌ڕاهێنه‌رایه‌تی یانه‌كه‌ی بۆ كۆتایی ئه‌م وه‌رزڤه‌ ڕاگه‌یاند.
ناوبراو له‌و لێدوانه‌دا وتی "تاكۆتایی ئه‌م وه‌رزه‌ له‌گه‌ڵ یانه‌كه‌م ده‌مێنمه‌وه‌، هه‌روه‌ك پێشتر به‌یاریزانانم ڕاگه‌یاند له‌كاتی دیاریكراودا ده‌ست له‌كار ده‌كێشمه‌وه‌."
مانشینی ئه‌وه‌شی ڕاگه‌یاند كه‌ بڕیاری كۆتایی خۆی داوه‌و لێی په‌شیمان نابێته‌وه‌، هه‌روه‌ها ئه‌وه‌شی دوپاتكرده‌وه‌ كه‌دۆڕانه‌كه‌ی شه‌وی ڕابردوو هیچ په‌یوه‌ندی به‌وه‌وه‌ نه‌بووه‌.
جێی ئاماژه‌یه‌ ئه‌م ڕاهێنه‌ره‌ به‌توانایه‌ له‌ساڵی 2004 په‌یوه‌ندی به‌یانه‌ی ناوبراوه‌وه‌ كردووه‌و توانیویه‌تی له‌ساڵانی "2006 و 2007" خولی كاڵچۆی ئیتاڵی بۆ یانه‌كه‌ی ده‌سته‌به‌ربكات، هه‌روه‌ها له‌ساڵانی "2005 و 2006" نازناوی جامی ئیتاڵیای بۆ یانه‌ی ئه‌نته‌رمیلان به‌ده‌ستهێنانه‌وه‌.

رِۆژنامه‌ی "سه‌نده‌ی میرۆر"ی ئینگلیزی له‌ چاپی دوێنی یه‌كشه‌ممه‌یدا بڵاویكرده‌وه‌ كه‌ یانه‌ی میلانی ئیتاڵی به‌ نیازی ئه‌وه‌یه‌ بۆندێك له‌گه‌ڵ یاریزانی فه‌رِه‌نسی له‌ تۆپی پێ ماتیۆ فلامینی مۆربكات، كه‌ له‌ یانه‌ی ئه‌رسناڵی ئینگلیزی یاری ده‌كات.
رِۆژنامه‌كه‌ رِوونیكردووه‌ته‌وه‌ فلامینی، كه‌ هه‌ینی رِابردوو ته‌مه‌نی بووه‌ 24 ساڵ، له‌ كۆتایی ئه‌م وه‌رزه‌دا بۆنده‌كه‌ی له‌گه‌ڵ یانه‌ی ئه‌رسناڵ كۆتایی دێت، ئه‌مه‌ش ده‌رگه‌ی ئه‌وه‌ له‌ به‌رده‌م یانه‌ی میلاندا ده‌كاته‌وه‌ كه‌ بتوانێت بۆندێكی له‌گه‌ڵدا مۆربكات له‌ پرۆسه‌یه‌كی گواستنه‌وه‌ی ئازاد و بێ به‌رامبه‌ردا.
جێگه‌ی ئاماژه‌یه‌ فلامینی تا ئێستا به‌ شێوه‌یه‌كی سه‌ره‌كی له‌ پێكهاته‌ی ئه‌رسناڵدا یاری ناكات، ئارسن ڤینگه‌ری رِاهێنه‌ریش زۆر جار وه‌كو یاریزانێكی لای چه‌پ یاری پێ ده‌كات، ئه‌مه‌ش یاریزانی ناوبراوی تورِه‌ كردووه‌، به‌وه‌ی له‌ شوێنی سه‌ره‌كی یارییكردنی خۆی دوور كه‌وتووه‌ته‌وه‌.
فلامینی له‌ هاوینی 2004 دا په‌یوه‌ندیی به‌ یانه‌ی ئه‌رسناڵه‌وه‌ كرد، دوای ئه‌وه‌ی بۆنده‌كه‌ی له‌گه‌ڵ یانه‌ی مه‌رسیلیای فه‌رِه‌نسی كۆتایی هات.