ئه‌ندامیكی به‌رپرس له‌ یه‌كیتی تۆپی پێی عێراق به‌ ده‌نگه‌كانی عێراقی ڕاگه‌یاند كه‌ یارییه‌كانی تۆپی پێی یانه‌ پله‌ نایابه‌كانی عێراق گروپی یه‌كه‌م و دوه‌م به‌هۆی چه‌ند هۆكارێكی هونه‌رییه‌وه‌ ڕاگیراون تاكاتێكی نادیار، به‌گوێره‌ی ئه‌م بڕیاره‌ یارییه‌كانی جه‌وله‌ی نۆیه‌می گروپی دوه‌می یانه‌كانی به‌غداد له‌گه‌ڵ جه‌وله‌ی حه‌وته‌می یارییه‌كانی گروپی یه‌كه‌م یانه‌كانی ناوه‌ڕاست و باشور ناكرێن و ده‌وه‌ستینرێت، ئه‌مه‌ش به‌هۆی ئه‌وه‌ی ڕیگه‌ بدرێت گشت یانه‌كان وه‌ك یه‌ك شانسی مه‌شقكردن و ڕاهینانیان هه‌بێت كه‌ ئێستا به‌هۆی تێكچونی باری ئاسایش و شه‌ڕو پێكدادانه‌كان ئه‌م كاره‌ مه‌حاڵه‌ ڕوبدات، ئه‌مه‌ش یه‌كه‌م هه‌نگاوی ڕاگرتنی یارییه‌كانی خولی نایابی عێراقه‌ كوربه‌ڵام ساڵی ڕابردوو ڕاوه‌ستان ڕویدا به‌هۆی شه‌ڕو پێكدادان و نه‌بونی دارایی له‌لایه‌ن یانه‌كانه‌وه‌، هه‌ربه‌هه‌مان هۆوه‌ یارییه‌كانی خولی یانه‌ پله‌ یه‌كه‌كانی عێراق گروپی به‌غداد كه‌ 21 یانه‌ن راگیراوه.

هه‌ڵبژارده‌ی‌ تۆپی‌ پێی‌‌ عێڕاق شكستی‌ خوارد له‌به‌رده‌م هه‌ڵبژارده‌ی‌ قه‌ته‌ر به‌ دوو گۆڵ به‌رامبه‌ر به‌ هیچ له‌ چوارچێوه‌ی‌ پاڵاوتن بۆ جامی‌ جیهانی‌ 2010 له‌ ئه‌فریقیای‌ باشوره‌.
ئه‌مه‌ش باری‌ هه‌ڵبژارده‌ی‌ عێراق قورستر ده‌كات پاش ئه‌وه‌ی‌ له‌ یه‌كه‌م یاریی پاڵاوتنه‌كه‌دا به‌رامبه‌ر هه‌ڵبژارده‌ی‌ چین به‌گۆڵێك یه‌كسان بوو. ‌ هاوكات هه‌ڵبژارده‌ی‌ قه‌ته‌ر به‌ چوار گۆڵ به‌رامبه‌ر به‌ گۆڵێك به‌ هه‌ڵبژارده‌ی‌ ئوسترالیا دۆڕا.
هه‌ردوو گۆڵه‌كه‌ی‌ قه‌ته‌ر‌ له‌ لایه‌ن یاریزانی‌ به‌نه‌ژاد به‌ڕازیلی‌ فابیۆ سیزاری‌ ژماره‌ 18 له‌ خوله‌كه‌كانی‌ یه‌ك و 66 تۆماركران.  
یارییه‌كه‌ كاتژمێر‌ شه‌ش و نیوی‌ ئێواره‌ به‌كاتی‌ به‌غدا ده‌ستیپێكردو  كه‌ناڵه‌ ئاسمانییه‌كانی‌ عێراقیه‌ سپۆرت و جه‌زیره‌ی‌ وه‌رزشی‌ راسته‌وخۆ گواستیانه‌وه‌.
هاوكات یاریزانی‌ ناوه‌ڕاستی‌ عێراق نه‌شئه‌ت ئه‌كره‌م له‌یارییه‌كه‌ی‌ ئه‌مڕۆدا به‌شدارنه‌بو به‌هۆی‌ هه‌بوونی‌ كارتی‌ سور له‌یاری‌ پێشوودا، هه‌روه‌ك یاریزانی‌ به‌رگری‌ باسم عه‌باس به‌هۆی‌ پێكانه‌وه‌ له‌م یارییه‌دا به‌شدارنه‌بوو.
جه‌ماوه‌رێكی‌ زۆر به‌ تاسه‌وه‌ چاوه‌ڕانی‌ ئه‌م یارییه‌بون به‌ڵام هه‌ڵبژارده‌ی‌ عێراق ئه‌و ئاسته‌ی‌ پێشكه‌ش نه‌كرد كه‌ جه‌ماوه‌ر چاوه‌ڕێی‌ بون.
جێی‌ وه‌بیرهێنانه‌وه‌یه‌ یاری‌ داهاتوی‌ هه‌ڵبژارده‌ی‌ عێراق به‌رامبه‌ر به‌ هه‌ڵبژارده‌ی‌ ئوستوڕالیا ده‌بێت.

ئه‌مرِۆ چوارشه‌ممه‌ به‌رِێوه‌به‌ری هه‌ڵبژارده‌ی عێراق له‌ ده‌وحه‌ی پایته‌ختی قه‌ته‌رِه‌وه‌ پێكهاته‌ی هه‌ڵبژارده‌كه‌ی بۆ یارییه‌كه‌ی ئه‌مرِۆ به‌رامبه‌ر هه‌ڵبژارده‌ی قه‌ته‌رِ ئاشكرد و ئاماژه‌ی به‌وه‌شدا كه‌ سه‌رۆك وه‌زیرانی عێراق و وه‌زیری وه‌رزش و لاوان په‌یوه‌ندییان پێوه‌كردوون و پاڵپشتییان كردوون.
ئه‌مرِۆ چوارشه‌ممه‌ عه‌بدولخالق مه‌سعود به‌رِێوه‌به‌ری هه‌ڵبژارده‌ی تۆپی پێ، پێكهاته‌ی سه‌ره‌كی هه‌ڵبژارده‌كه‌ی بۆ یارییه‌كه‌ی ئه‌مرِۆ به‌رانبه‌ر قه‌ته‌رِ ئاشكرا كرد، كه‌ له‌ میانه‌ی جه‌وله‌ی دووه‌می پاڵاوتنه‌كانی كێشوه‌ری ئاسیایه‌ بۆ گه‌یشتن به‌ جامی جیهانی 2010 یه‌ .
به‌رِێوه‌به‌ری هه‌ڵبژارده‌ی عێراق له‌مباره‌یه‌وه‌ وتی:" ئه‌مرِۆ به‌ پلانی 3-5-2 یاری ده‌كه‌ین، پێكهاته‌كه‌ش پێكهاتووه‌ له‌ :
 گۆڵچی " نورِ سه‌برِی.
به‌رگرییكاران" عه‌لی حوسێن ره‌حێمه‌- جاسم محه‌مه‌د غولام- حه‌یده‌ر عه‌بدولئه‌میر. هێڵی ناوه‌رِاست: هاوار مه‌لا محه‌مه‌د- قوسه‌ی مونیر- ئه‌حمه‌د عه‌بد عه‌لی كوبی- مه‌هدی كه‌ریم- كه‌رِار جاسم.
هێڵی هێرشبردن" یوونس مه‌حموود- عیماد محه‌مه‌د.
عه‌بدولخالق مه‌سعود ئاماژه‌ی به‌وه‌شدا كه‌ سه‌رۆك وه‌زیرانی عێراق نوری مالیكی، هه‌روه‌ها وه‌زیری وه‌رزش و لاوانی عێراق په‌یوه‌ندیی ته‌له‌فۆنییان بۆ ئه‌و كردووه‌ و پاڵپشتیی حكومه‌ت و وه‌زاره‌تی ناوبراو و وه‌رزشوانانی عێراقیان بۆ هه‌ڵبژارده‌ی عێراق دووپاتكردۆته‌وه‌.
وتیشی:" لایه‌نی قه‌ته‌رِیی شه‌رِێكی ئیعلامییان به‌رانبه‌ر هه‌ڵبژارده‌ی عێراق ئه‌نجام داوه‌ و وره‌ی یاریزانانی خۆیان به‌رز ده‌كه‌نه‌وه‌.
هه‌ڵبژارده‌ی عێراق له‌ گروپی یه‌كه‌می پاڵاوتنه‌كانی كێشوه‌ری ئاسیایه‌بۆ گه‌یشتن به‌ مۆندیالی باشووری ئه‌فریقیای 2010 و له‌ یاری یه‌كه‌میشدا به‌رانبه‌ر هه‌ڵبژارده‌ی چین یه‌كسان بوو، كه‌ له‌ ئیمارات به‌رِێوه‌چوو.
له‌لایه‌كی دیكه‌وه‌ هه‌ر له‌ گرووپی یه‌كه‌مدا به‌یانی ئه‌مرِۆ به‌ كاتی به‌غدا، هه‌ردوو هه‌ڵبژارده‌ی چین و ئوسترِالیا له‌ جه‌وله‌ی دووه‌مدا به‌یه‌ك گه‌یشتن و له‌ ئه‌نجامیشدا به‌بێ گۆڵ یه‌كسان بوون.
هه‌ڵبژارده‌ی عێراق كه‌ پاڵه‌وانی جامی نه‌ته‌وه‌كانی ئاسیای 2007 ه‌، له‌ مێژووی خۆیدا ته‌نها یه‌كجار گه‌یشتۆته‌ كۆتایی مۆندیال، كه‌ ئه‌ویش له‌ ساڵی 1986 بوو له‌ وڵاتی مه‌كسیك.

هه‌ڵبژارده‌ی عێراق سبه‌ینێ ده‌كه‌وێته‌ تاقیكردنه‌وه‌یه‌كی قورسه‌وه‌و جگه‌ له‌به‌ده‌ستهێنانی ئه‌نجامی باش هیچ شتێك له‌سودی نیه‌.
بڕیاره‌ سبه‌ینێ چوارشه‌ممه‌ یاریه‌كانی قۆناغی سێهه‌می پالاوتنی هه‌ڵبژارده‌كانی كیشوه‌ری ئاسیا بۆ مۆندیالی 2010ی ئه‌فریقای باشور جه‌وله‌ی دووه‌می خۆی ده‌ستپێبكات، له‌نێوان ئه‌و یاریانه‌داو له‌گروپی یه‌كه‌مدا هه‌ڵبژارده‌ی عێراقی پاڵه‌وانی ئاسیا خۆی له‌به‌رده‌م تاقیكردنه‌وه‌یه‌كی قورس و گراندا ده‌بینێته‌وه‌، ئه‌ویش به‌ڕوبه‌ڕوبونه‌وه‌ی به‌رامبه‌ر هه‌ڵبژارده‌ی قه‌ته‌ر، ئه‌م یاریه‌ كه‌له‌یاریگای هه‌ڵبژارده‌ی دووه‌م به‌ڕێوه‌ده‌چێت بۆ هه‌ردولا گرنگی ده‌بێت، به‌تایبه‌ت عێراق، چونكه‌ به‌ره‌نگاربونه‌وه‌ی هه‌ڵبژارده‌یه‌كی وه‌ك قه‌ته‌ر كارێكی ئاسان نیه‌و سه‌ركه‌وتن به‌سه‌ریدا پێویستی به‌كۆشش و هه‌وڵی زۆره‌، عێراق ئێستا كه‌خاوه‌نی ته‌نها خاڵێكه‌و له‌پله‌ی سێهه‌می گروپه‌كه‌ی دێت بۆ ئه‌وه‌ی به‌ره‌و پله‌كانی پێشه‌وه‌ هه‌نگاوبنێت و هیوای به‌سه‌ركه‌وتن بۆ مۆندیالی داهاتوو بمێنێت جگه‌ له‌سه‌ركه‌وتن ئه‌نجامی دی سودی پێنابه‌خشێت.
یاریه‌كانی تریش به‌پێی ئه‌م خشته‌یه‌ی خواره‌وه‌ به‌ڕێوه‌ده‌چێت:
چین * ئوستورالیا ، تایلاند * عومان ، به‌حره‌ین * یابان ، توركامنستان * ئه‌رده‌ن ، كۆریای باكور * كۆریای باشور ، ئۆزبه‌كستان * سعودیه‌ ، سه‌نگافوره‌ * لوبنان ، سوریا * ئیمارات ، كوێت * ئێران.

هه‌خولی یانه‌ پاڵه‌وانه‌كانی ئاسیا هه‌ردوو یانه‌ی هه‌ولێرو قوه‌جه‌ویه‌ی نوێنه‌ری عێراق له‌دوو ڕوبوڕوبونه‌وه‌ی جیادا به‌رامبه‌ر دوو یانه‌ی كوێتی ده‌بنه‌وه‌.
بڕیاره‌ ئه‌مڕۆ یاریه‌كانی جه‌وله‌ی دووه‌می قۆناغی یه‌كه‌می خولی یانه‌ پاڵه‌وانه‌كانی ئاسیا له‌نێوان یانه‌ به‌شداربوه‌كانی خوله‌كه‌وه‌ به‌ڕێوه‌بچێت، هه‌ردوو یانه‌ی هه‌ولێر و قوه‌جه‌ویه‌ وه‌ك نوێنه‌ری عێراق له‌یاری ئه‌مڕۆیاندا ڕوبه‌ڕوی دوو یانه‌ی كوێتی ده‌بنه‌وه‌، یانه‌ی هه‌ولێر كه‌له‌گروپی چواره‌مدایه‌و له‌یاری جه‌وله‌ی یه‌كه‌مدا به‌رامبه‌ر یانه‌ی غه‌رافه‌ی پاڵه‌وانی وه‌رزی پێشوی خولی قه‌ته‌ری به‌گۆڵێك یه‌كسان بوو، له‌م یاریه‌داو له‌یاریگای كوێت به‌رامبه‌ر یانه‌ی قادسیه‌ی كوێت ده‌وه‌ستێته‌وه‌، كه‌ئه‌م یانه‌یه‌ی دوایی له‌یاری یه‌كه‌مدا پاش بردنه‌وه‌ی له‌یانه‌ی باختاكۆری ئۆزبه‌كستانی بوه‌ خاوه‌نی سێ خاڵ و له‌پله‌ی یه‌كه‌می گروپه‌كه‌یدا دێت و یانه‌ی هه‌ولێریش به‌كۆكردنه‌وه‌ی یه‌ك خاڵ له‌پله‌ی سێهه‌مدا دێت بۆیه‌ له‌هه‌وڵی ئه‌وه‌دایه‌ ئه‌م یاریه‌ له‌به‌رژه‌وه‌ندی خۆی كۆتایی پێبێنێت و به‌ره‌و پله‌كانی پێشه‌وه‌ هه‌نگاوبنێت.
یانه‌ی قوه‌جه‌ویه‌ش وه‌ك یانه‌ی دووه‌می عێراق له‌گروپی دووه‌می پاڵه‌وانێتیه‌كه‌ گیرساوه‌ته‌وه‌و پاش ئه‌وه‌ی یاری یه‌كه‌می به‌سه‌ركه‌وتووی به‌رامبه‌ر یانه‌ی وه‌صڵی ئیماراتی به‌گۆڵێكی بێ به‌رامبه‌ر كۆتایی پێهێنا ده‌یه‌وێت له‌م یاریه‌یدا كه‌به‌رامبه‌ر یانه‌ی كوێتی كوێتی ده‌وه‌ستێـته‌وه‌ سه‌ركه‌وتن به‌ده‌ستبێنێت و ببێته‌ خاوه‌نی شه‌ش خاڵ.

اش تۆماركردنی یه‌كه‌مین سه‌ركه‌وتن، وه‌زیری به‌رگری عێراقی خه‌لاتی تیپی تۆپی پێی یانه‌ی وه‌رزشی قوه‌جه‌ویه‌ی كرد.
له‌دوای تۆماركردنی یه‌كه‌مین بردنه‌وه‌ له‌خولی یانه‌ پاڵه‌وانه‌كانی ئاسیا به‌رامبه‌ر یانه‌ی وه‌صڵی ئیماراتی به‌گۆڵێكی بێ به‌رامبه‌ر، تیپی تۆپی پپێی یانه‌ی وه‌رزشی قوه‌جه‌ویه‌، له‌لایه‌ن "عه‌بدولقادر عوبێد" وه‌زیری به‌رگری عێراقیه‌وه‌ خه‌لاتكران، به‌پێی هه‌واڵی ڕۆژنامه‌ عێراقیه‌كان جگه‌ له‌خه‌لاتكردن وه‌زیری ناوبراو فه‌رمانی كردووه‌ به‌دابینكردنی فرۆكه‌یه‌كی تایبه‌تی بۆ گواستنه‌وه‌ی وه‌فدی تیپی تۆپی پێی یانه‌كه‌ له‌فرۆكه‌خانه‌ی نێوده‌وڵه‌تی دوبه‌ی بۆ فرۆكه‌خانه‌ی نێ،ده‌وڵه‌تی له‌به‌غداد.
ئه‌مه‌ له‌كاتێكدا دێت كه‌یانه‌ی هه‌ولێریش شانبه‌شانی یانه‌ی ناوبراو وه‌ك نوێنه‌ری عێراق به‌شدارن له‌وپاڵه‌وانێتیه‌دا، به‌لام یانه‌ی هه‌ولێر له‌یه‌كه‌م یاری خۆیدا نه‌یتوانی سه‌ركه‌وتن به‌ده‌ستبێنێت و له‌گه‌ڵ یانه‌ی غه‌رافه‌ی قه‌ته‌ری به‌گۆڵێك بۆ هه‌ردولا .

بڕیاروایه‌ سبه‌ینی‌ َچوارشه‌ممه‌ یانه‌ی‌ هه‌ولێر و قادسیه‌ی‌ كوه‌یتی‌ له‌یارییه‌كی‌ چاره‌نوسسازدا به‌یه‌ك بگه‌ن .
له‌میانه‌ی‌ یارییه‌كانی‌ خولی‌ یانه‌ پاڵه‌وانه‌كانی‌ ئاسیا و له‌جه‌وله‌ی‌ دووه‌می‌ ئه‌و پاڵه‌وانێتییه‌دا ، ڕۆژی‌ چوارشه‌مه‌ كاتژمێر 6 ی‌ ئێواره‌ به‌كاتی‌ هه‌رێمی‌ كوردستان ، یانه‌ی‌ هه‌ولێر كه‌ شانبه‌شانی‌ یانه‌ی‌ قوه‌جه‌ویه‌ نوێنه‌رایه‌تی‌ تۆپی‌ پێی‌ عێراق ده‌كه‌ن ده‌بێته‌ میوانی‌ یانه‌ی‌ قادسیه‌ی‌ كوه‌یتی‌  له‌ولاَتی‌ كوه‌یت .
له‌و یارییه‌دا یانه‌ی‌ هه‌ولێر هه‌وڵ ده‌دات به‌هه‌ر شێوه‌یه‌ك بێت یارییه‌كه‌ له‌به‌رژه‌وه‌ندی‌ خۆیان كۆتایی‌ پێ بێنن و 3 خاڵی‌ گرنگ به‌ده‌ست بهێنن بۆ ئه‌وه‌ی‌ له‌ كێبركێكه‌دا بمێنێته‌وه‌ .
جێی‌ بیر هێنانه‌وه‌یه‌ یانه‌ی‌ هه‌ولێر له‌یه‌كه‌م یاری‌ خۆیدا كه‌ له‌گه‌ڵ یانه‌ی‌ غه‌رافه‌ی‌ قه‌ته‌ری‌ یاری‌ كرد و نه‌یتوانی‌ سه‌ركه‌وێت به‌سه‌ریدا و به‌یه‌كسان بون به‌ گۆڵێك بۆ هه‌ردوولا كۆتایی‌ هات و بوو به‌ خاوه‌نی‌ ته‌نها خاڵێك ، ئه‌مه‌ له‌كاتێكدایه‌ كه‌ یانه‌ی‌ قادسیه‌ له‌یاری‌ پێشودا توانی‌ 3 خاڵ له‌یانه‌ی‌ باختاكوری‌ ئۆزبه‌كی‌ بسه‌نێت .
له‌لایه‌كی‌ دیكه‌شه‌وه‌ نوێنه‌ره‌كه‌ی‌ دیكه‌ی‌ عێراق كه‌ یانه‌ی‌ قوه‌جه‌ویه‌یه‌ به‌رامبه‌ر به‌یانه‌ی‌ كوه‌یتی‌ كوه‌یتی‌ یاری‌ ده‌كات .